главная

другие события

Тыдзень бібліятэк краiн Паўночнай Еўропы

17 лістапада 2017 года ДУ "Мінская абласная бібліятэка імя А.С. Пушкіна" у чарговы раз стала адной з пляцовак для правядзення Тыдня бібліятэк краін Паўночнай Еўропы ў Беларусі пры падтрымцы Цэнтра шведскіх даследаванняў і Савета міністраў Паўночных краін.

Сустрэча пачалася з уступнага слова ад кіраўніцтва бібліятэкі. Намеснік дырэктара па бібліятэчнай рабоце Белавушка Наталля Уладзіміраўна выразіла падзяку Цэнтру шведскіх даследаванняў і асабіста дырэктару Марыі Сяргееўне Сакавец, і падкрэсліла неабходнасць правядзення такіх мерапрыемстваў. Тым больш, што літаратура Паўночных краін карыстаецца попытам сярод наведвальнікаў бібліятэкі, як дзяцей, так і дарослых. Таму папулярызацыя, прапаганда і знаёмства з гэтай літаратурай неабходны. Некаторыя кнігі чытачы бібліятэкі ўжо ведаюць: гэта творы Астрыд Ліндгрэн, серыя кніг пра Маму Му і Крумкача Юі Вісландэр, кнігі Свэна Нурдквіста пра прыгоды Пэтсана і Фіндуса і шмат іншых.

У сваю чаргу дырэктар Цэнтра шведскіх даследаванняў Марыя Сакавец прэзентавала праэкт "Тыдзень бібліятэк Паўночных краін". А потым разам са студэнткай факультэта міжнародных адносін БДУ правяла віктарыну, прысвечаную Паўночным краінам і літаратуры Паўночных краін. Па выніках віктарыны адбылося ўзнагароджванне пераможцаў.

Белавушка Наталля Уладзіміраўна

Самым цікавым момантам сустрэчы было знаёмства дзяцей з творам "Выспа скарбаў" у апрацоўцы фінскага дзіцячага аўтара Мауры Куннаса. Фінская літаратура ў гэтым годзе абрана не выпадкова, бо Фінляндыя святкуе 100-годдзе з Дня незалежнасці.

Перад чытаннем урыўка твора "Выспа скарбаў" з удзельнікамі мерапрыемства была праведзена кароткая гутарка, каб патлумачыць значэнні некаторых складаных слоў з тэксту на беларускай мове і прадставіць аўтара.

Чытанне ўрыўка было па ралях у выглядзе маляўнічай інсцэніроўкі з удзелам студэнтаў факультэта міжнародных адносін БДУ. Пасля дзяцей чакалі пытанні па прачытаным з невялікімі падарункамі за правільныя адказы. Фінальным этапам стаў салодкі стол для ўсіх удзельнікаў мерапрыемства.

Увогуле сустрэча была цікавай, захапляльнай і карыснай. Чакаем наступных сустрэч з творамі і аўтарамі Паўночных краін!!!

Вялiкая падзяка

супрацоўнікам аддзела замежнай лiтаратуры

i аддзела абслугоўвання дзiцячага чытача

за падрыхтоўку цудоўнага мерапрыемства!