У Мінску Колас скончыў свае найлепшыя паэмы “Новая зямля” і “Сымон-музыка”, напісаў трылогію “На ростанях”, апавяданне “Дрыгва”, дзіцячыя творы “Міхасёвы прыгоды”, “Савось-распуснік”, былі распачаты паэмы “На шляхах волі” і “Рыбакова хата”, выйшаў у свет зборнік апавяданняў “Казкі жыцця”.
У 1926 годзе Якубу Коласу нададзена званне народнага паэта Беларусі.
Але на змену значных поспехаў, якія дасягнула беларуская культура за перыяд  20—30-х гг., прыйшоў трагічны і драматычны час, перыяд беспадстаўных рэпрэсій. Вялікі ціск са стараны ўлады быў і на Якуба Коласа: крытыка, вобыскі, допыты. Былі арыштаваны і рэпрэсаваны блізкія сваякі паэта — дзядзька па матчынай лініі, грамадскі і палітычны дзеяч, мовазнавец Язэп Лёсік, родны брат жонкі Коласа Аляксандр Каменскі.
А потым пачалася Вялікай Айчыннай вайна… Двухпавярховы дом Якуба Коласа ў Вайсковым завулку, зараз тэрыторыя Цэнтральнага дзіцячага парка імя Горкага ў Мінску, быў поўнасцю зруйнаваны 24 чэрвеня 1941 года падчас нямецкай бамбёжкі…
Другую экспазіцыю выставы складаюць самабытныя чорна-белыя фотаздымкі беларускага Палесся амерыканскага фатографа Джона Кунстадтэра.
Піншчына… Вёскі Люсіна і Пінкавічы… Менавіта тут прайшлі першыя гады настаўніцтва Якуба Коласа. У “пінскі” перыяд адбылася сустрэча Коласа са сваёй жонкай Марыяй Дзмітрыеўнай Каменскай, якую ён кахаў на працягу ўсяго жыцця,  і нараджэнне першага сына Данііла.
Цікавым фактам з’яўляецца тое, што жыхары вёскі Пінкавічы сталі прататыпамі герояў трылогіі “На ростанях”.
Удзельнікі экскурсіі засталіся ў вялікім захапленні, задавалі шмат пытанняў пра сям’ю Коласа і яго нашчадкаў, а таксама абмяркоўвалі спрэчныя моманты жыцця і творчасці беларускага песняра.
А мы нагадваем, што выстава “К табе я ў думках залятаю…” дзейнічае па 31.01.2023 у Мінскай абласной бібліятэцы імя А. С. Пушкіна па адрасе: г. Мінск, вул. Гікалы, 4 (другі паверх, выставачная зала).
Уваход вольны.

Матэрыял падрыхтаваны аддзелам краязнаўчай літаратуры